આ પાનાનું પ્રુફરીડિંગ થઈ ગયું છે
ખોવાતું ચિત્ત
નયને જલ એ વહતાં રડતો !
સુખમાં પછી હું ન મ્હને ગમતો !
મુજથી પણ આ મુજ ચિત્ત બને ગુમ
એ સહવું ક્યમ ? ના સમજ્યો !
ઉર બ્હાર વહી જ ઉરત્વ જતું !
જલથી જ્યમ દૂર જલત્વ બને, અહ !
મીન ગરીબ રહે : ન મરે, અહ !
એ સહતાં ય સહ્યું ન થતું !
૨૫-૫-૯૮
જેને વીતી ગઈ
'જેને વીતી તે તો જાણે,'
જખમી એવું માની મ્હાણે;
ખોળામાં શિર ધરવા આણે,
ત્યાં આ ખંજર શું ?
જેને વીતી તે બોલે છે :
'હાં ! કૈં વીતે તો તુંને છે !
'વીતે તો છોને વીતે છે !
'વીતે એમાં શું ?'
જેને વીતી ગઈ સંસારે,
તે તો બેપરવાઈ ધારે !
વીતે છે તેને તો,
જેને વીતી તે લાધ્યે શું ?
જેને વીતી તે સાથે શું ?
વીજ વાદળી સાથે જાતી,
કાલે ગઈ આજે ભૂલાતી !
સૂકાઈ કોરી છાતી થઈ,
જેને વીતી ગઈ !
૧-૬-૯૮
કલાપીનો કેકારવ/૪૯૦