આ પાનાનું પ્રુફરીડિંગ બાકી છે
આછી-આછેરી આભલાંની છાય રે
પાણિડાં હેલે ચ્હડ્યાં, હેલે ચ્હડ્યાં :
ઝીણી-ઝીણેરી ચન્દની સુહાય રે,
પાણિડાં હેલે ચ્હડ્યાં, હેલે ચ્હડ્યાં:
એવાં વ્હાલાંનાં સ્વપ્ન આવે જાય રે,
પાણિડાં હેલે ચ્હડ્યાં, હેલે ચ્હડ્યાં.
સન્ધ્યા સમે અવનીના પટ ફોડી ફોડી
જેવી ફૂટે તિમિરની વિભુ મોજમાલાઃ
ત્હેવા સરોવર તણા તટ તોડી તોડી
તોફાની મસ્ત જલના ઉછળે ઉછાળા.
મહા પૂર એ ન પાળમાં પૂરાય રે,
પાણિડાં હેલે ચ્હડ્યાં, હેલે ચ્હડ્યાં:
ત્હો ય માઝા ન સાગરે મૂકાય રે,
પાણિડાં હેલે ચ્હડ્યાં, હેલે ચ્હડ્યાં:
મ્હારા હૈયાના સરોવર માંહ્ય રે
પાણિડાં હેલે ચ્હડ્યાં, હેલે ચ્હડ્યાં.
