આ પાનાનું પ્રુફરીડિંગ થઈ ગયું છે
૧૯૬
રાષ્ટ્રિકા
પ્રભુના અમૃતરસ રેલાતા,
આજે ભારતવીર ભીંજાતા ;
કોણ ગણે ત્યાં ઘણઘા તાતા ?
હો મહાન નવજુવાન !
જીવન નવલ ઘડાવા લાગ્યાં,
હૃદય પ્રબળ ઝબકીને જાગ્યાં,
આત્મવિજય ચોઘડિયાં વાગ્યાં :
હો મહાન નવજુવાન !
યુદ્ધ અનાયુધ આ છે એવું,
સત્ય અહિંસાનું બળ કેવું !
દુનિયાને નવલું કંઈ દેવું :
હો મહાન નવજુવાન !
આજ નથી કો રમતઅખાડો,
આજ નથી રસગ્રંથ પવાડો ;
આજે શૂરવીરોનો દહાડો !
હો મહાન નવજુવાન !