કિલ્લોલ/ચુંદડી
< કિલ્લોલ
| ← પીપર ફાલી | કિલ્લોલ ચુંદડી ઝવેરચંદ મેઘાણી ૧૯૨૯ |
હાલો ગલૂડાં રમાડવા → |
ચુંદડી
[ધુંબડી સૈયરમાં રમે - એ ઢાળ]
ચુંદડી ચૌદ લોકમાં ગોતું.
આભમાં ગોતું
ગેબમાં ગોતું
સાત પાતાળે ઘૂમતી ગોતું – ચુંદડી૦
ચુંદડી ચાર રંગમાં બોળી !
લાલ પીળા પરભાતમાં બોળી
ચાંદલી પૂનમ રાતમાં બોળી
વીજળી કેરા હોજમાં બોળી
મેઘ-ધનુના ધોધમાં બોળી – ચુંદડી૦
ચુંદડી ચાર ચોકમાં ઓઢું
માન સરોવર ઝીલતી ઓઢું
આભની વેલ્યે વીણતી ઓઢું
ડુંગરે ડુંગર દોડતી ઓઢું
વાયરા ઉપર પોઢતી ઓઢું – ચુંદડી૦
ચુંદડી ચાર છેડલે ફાટી
રાસડા લેતાં
તાળીઓ દેતાં
સાગરે ના'તાં નીરમાં ફાટી- ચુંદડી૦
♣