પ્રેમાનંદ સ્વામી.
પદ ૧ થાળ ગરબી ૧.
અવિનાશી આવો રે, જમવા શ્રીકૃષ્ણ હરિ,
શ્રી ભક્તિધર્મસુત રે, જમાડું પ્રીત કરી ... ૧
શેરડિયો વાળી રે, ફૂલડાં વેર્યાં છે,
મળિયાગર મંદિર રે, લીપ્યાં લેર્યાં છે ... ૨
ચાખડિયો પહેરી રે, પધારો ચટકંતા,
મંદિરિયે મારે રે, પ્રભુજી લટકંતા ... ૩
બાજોઠે બેસારી રે, ચરણકમળ ધોવું,
પામરીએ પ્રભુજી રે પાવલિયા લોવું ... ૪
ફુલેલ સુગંધી રે, ચોળું શરીરે,
હેતે નવરાવું રે હરિ ઊને નીરે ... ૫
પહેરાવું પ્રીતે રે, પીતાંબર ધોતી,
ઉપરણી ઓઢાડું રે, અતિ ઝીણાં પોતી ... ૬
કેસર ચંદનનું રે, ભાલે તિલક કરું,
વંદન કરી સ્વામી રે, ચરણે શીશ ધરું ... ૭
ઉર હાર ગુલાબી રે, ગજરા બાંધીને,
નીરખું નારાયણ રે, દ્રષ્ટિ સાંધીને ... ૮
શીતળ સુગંધી રે, કળશ ભર્યા જળના,
ઉલેચ બાંધ્યા છે રે, ઉપર મખમલના ... ૯
કંચન બાજોઠે રે, બિરાજો બહુનામી,
પકવાન પીરસી રે, થાળ લાવું સ્વામી ...૧૦
મોતૈયા લાડુ રે, સેવૈયા સારા,
તમ કાજ કર્યા છે રે, લાખણસાઈ પ્યારા ...૧૧
મગદળ (ને) સેવદળ રે, લાડુ દળના છે,
ખાજા ને ખુરમા રે, ચૂરમાં ગોળનાં છે ...૧૨
જલેબી ઘેબર રે, બરફી બહુ સારી,
પેંડા પતાસાં રે, સાટાં સુખકારી ...૧૩
