આ પાનાનું પ્રુફરીડિંગ બાકી છે
ભાગ બીજો
૨૧
આભને આરે ચાંદલો
આભને આરે ચાંદલો, હો નણદલ નેણમીઠડાં !
કાંઈ રસનો ઉગ્યો રસરાજ;
હો નણદલ ! નિરખો એ ચન્દ નેણમીઠડાં.
ચોકમાં ચન્દની ઢોળાણી, હો નણદલ નેણમીઠડાં !
કાંઈ આવો એ ઝીલવાને કાજ;
હો નણદલ ! નિરખો એ ચન્દ નેણમીઠડાં.
વીરા ત્હમારા વેગળા, હો નણદલ નેણમીઠડાં !
જાણે આકાશઆરાના ચન્દ;
હો નણદલ ! નિરખો એ ચન્દ નેણમીઠડાં.
વીંધી આઘેરી વાટડી, હો નણદલ નેણમીઠડાં !
ઉરે બોલે એના પડછન્દ;
હો નણદલ ! નિરખો એ ચન્દ નેણમીઠડાં.
ઝાંખી-ઝાંખીને થાકી ગઇ, હો નણદલ નેણમીઠડાં !
એ તો હૈયે-લલાટે, ત્હો યે દૂર;
હો નણદલ ! નિરખો એ ચન્દ નેણમીઠડાં.
અંગ અડકે, ના ઝલાય એ, હો નણદલ નેણમીઠડાં !
એવાં પ્રીતમની ચન્દનીનાં પૂર,
એવા વ્હાલમની વાંસળીના સૂર;
હો નણદલ ! નિરખો એ ચન્દ નેણમીઠડાં.
