આ પાનાનું પ્રુફરીડિંગ બાકી છે
૬૮
ન્હાના ન્હાના રાસ
વડલો
વડલો વનશોભાનો રાજવી રે !
વડલો સાયરસરને તીર જો;
વડલો ઘટાગુફાઓથી ડોલતો રે,
વડલો, મેઘ શો, ઘેરગમ્ભીર જો:
વડલો ગુણગરવો ગોરંભતો રે.
ચાર-ચાર માંડી દિશાઓ દિગન્તમાં રે,
ચાર-ચાર માંડ્યા ખંડ આ લોક જો;
ચાર-ચાર મારગ વનવન વીંધતા રે,
સહુના સંગમ વડને ચોક જો:
વડલાની કુંપળીએ વેદ ચારે લખ્યા રે
વડલાને ગોખ કાંઈ કોકિલા ટ્હૌકા ઝીલે રે,
વડલાની ડાળીએ મોરલા ઝૂલે જો;
વડલાને છાંયડે તપસી તપસ્યા તપે રે,
ગોપ કો વાંસળી વાતાં ભૂલે જો:
વડવાઈની જાળીઓ ભૂલભૂલામણી રે.
ધોમ ધખ્યા, ને પિયાવા માંડિયા રે,
પન્થી આવે-આવે, ને જાય જો;
વિસામે ઘડિયેક કાંઈ વિરમે રે,
મીઠડાં પાણી, પ્રારબ્ધ શાં, પાય જો:
જોગન્દર વડલો જોગસમાધિમાં રે.
