આ પાનાનું પ્રુફરીડિંગ થઈ ગયું છે
રાય રે જીવન તારું
રાય રે જીવન તારું શે'ર અતિ સાંકડું રે,
મારા હરિવરની હાથીડા ન માય રે,
અક્ષરપતિ આવિયા રે... ટેક
રાય રે જીવન તારી બજાર્યું બહુ સાંકડી રે,
રથ પાલખીને સાંકડ બહુ થાય રે... અક્ષરપતિ. ૧
રાય રે જીવન તારી શેરી બહુ સાંકડી રે,
મારા હરિવરના જાનૈયા ન માય રે... અક્ષરપતિ. ૨
રાય રે જીવન તારી મેડી બહુ સાંકડી રે,
મેડિયે અમર વેમાન અટકય રે... અક્ષરપતિ. ૩
રાય રે જીવન તારો માંડવો બહુ સાંકડો રે,
મારા હરિવરની જાનરડી ન માય રે... અક્ષરપતિ. ૪
રાય રે જીવન તારે આંગણિયે ઊભા રહ્યા રે,
ત્રિભોવનપતિ પરબ્રહ્મરાય રે... અક્ષરપતિ. ૫
રાય રે નીરખીને નેણાં શીતળ થયાં રે,
તન મન પ્રેમાનંદ વારી જાય રે... અક્ષરપતિ. ૬
