આ પાનાનું પ્રુફરીડિંગ થઈ ગયું છે
કર્ત્તવ્યનાં ગીતો
૧૯૩
ગુજરાતનો યજ્ઞકુંડ
• પદ[૧] •
દુઃખમાં શૂરા રે, હો ગુજરાતી વીરા !
આવો, પૂરા રે ખમવા દુઃખના ચીરા !
કડકડ ફૂટે ક્રોડ કડાકા, પર્વત ફૂંકે ફાટે ;
ઝળઝળ જ્વાળા વ્યોમ જળાવે : ઊભા રહો દૃઢ વાટે !
દુઃખમાં શૂરા રે ! ૧
નથી પડવું યાહોમ કરીને આજે અંધ શૂરાનું ;
નથી અબળને દમવું : આ છે જડચેતનનું લહાણું !
દુઃખમાં શૂરા રે ! ૨
સત્ય જ પ્રભુના પ્રાણ અમારા, સત્ય જ અંગ અમારાં;
સત્ય જ રક્ત વહે અમ નસમાં, સત્ય જ વ્રત અમ ન્યારાં :
દુઃખમાં શૂરા રે ! ૩
માયા સૌ ઘરબાર તણી ને સુખની પૂતળી દફની ;
આત્મશૌર્યનાં શ્વેત સજ્યાં પટ, ના કાયરની કફની :
દુઃખમાં શૂરા રે ! ૪
- ↑ "ભારતી ભૈયા રે ! શંખ સુણ્યો ન હજી શું ? - એ ચાલ.
