સખીને આમંત્રણ
| સખીને આમંત્રણ મણિશંકર રત્નજી ભટ્ટ-'કાન્ત' |
સખીને આમંત્રણ
ચાલોને સહોયર ! ઉન્નત જીવના ઝીલવાને જઇએ રે !
પુણ્યસલિલવગાહનથી, સખિ ! અંતર પાવન થઇએ રે !
ચાલો ને, સહિયર∘
પ્રભુના ગિરિથી અવતરે શાંત સદાશિવ નીર;
શમવે મનકુલ તાપને છાયા તરુવર તીર !
શીતલ સૌમ્ય સુધારસ, સુંદરિ ! રેલી રહ્યો , જઇ લઇએ રે !
ચાલો ને, સહિયર∘
સ્ફટિક વિશદ વરસી રહ્યા સુરસરિતાના ધોધ;
લલિત કરી ક્લાંતાત્માને પ્રેરે પ્રાણ પ્રબોધ!
સાડી સજો, સખિ ! સ્નેહસુરંગી : વારિ પરસ્પર દઇએ રે !
ચાલોને સહોયર ! ઉન્નત જીવના ઝીલવાને જઇએ રે !
🙝