ગુજરાતની ગઝલો/રુબાઈ
| ← તું સુખી મારા વાસમાં? | ગુજરાતની ગઝલો રુબાઈ [[સર્જક:|]] ૧૯૪૩ |
દિલરુબાના હાથમાં → |
ખ્વાજા ભક્ત સત્તારશાહ નિઝામી
વિશ્વવ્યાપી છે, છતાં સંતાય છે,
એ સનમ શરમાળ છે શરમાય છે. ૧
પ્રેમીઓના દિલમાં લાગી લહાય છે,
નેવનાં જલ મોભે જઈ ઊભરાય છે. ૨
દેખીને બળતાં હૃદય બોલ્યા સનમ,
છો બળે એ મોજ મારી થાય છે. ૩
કોઈ રડતા, કોઈ હસતા જાય છે,
જેના જેવાં કર્મ તેવો ન્યાય છે. ૪
સદ્દગુરુ કર સત્ અનુભવ પામવા,
મનમુખી ઊંચે ચડી પછડાય છે. ૫
પ્રેમીઓ પહેલાં રડે, પાછળ હસે,
સાંભળો છો, શું કહ્યું? સમજાય છે. - ૬
જિંદગી કુરબાન કરવા પ્રેમમાં,
પ્રેમી જીવો પ્રેમપંથે ધાય છે. ૭
પ્રેમ વિણ જીવ મોહના ફંદે ફસી
દામમાં કે કામમાં લલચાય છે. ૮
પ્રેમીઓ વિણ બાકીના 'સત્તારશાહ'
'કોણ દુનિયાથી હસીને જાય છે? ૯