ઘનશ્યામ નામને હું જાઉં વારણે

વિકિસ્રોતમાંથી
Jump to navigation Jump to search
ઘનશ્યામ નામને હું જાઉં વારણે
પ્રેમાનંદ સ્વામી



ઘનશ્યામ નામને હું જાઉં વારણે જો,
પુરુષોત્તમ પ્રગટ્યા અમ કારણે જો... ઘનશ્યામ ૧

આવ્યા દીન તણાં દુઃખ કાપવા જો,
નિજ જનને વાંછિત સુખ આપવા જો... ઘનશ્યામ ૨

આવ્યા અધર્મનાં મૂળ ઉખાડવા જો,
કળિમળ રૂપ મતને પાછો પાડવા જો... ઘનશ્યામ ૩

ધરી મૂર્તિ મુનિ મનમોહની જો,
જાદુગારી વહાલાજીની જોહની જો... ઘનશ્યામ ૪

વશીકરણ ભર્યાં એનાં વેણ છે જો,
સ્નહ કરુણાભર્યાં એનાં નેણ છે જો... ઘનશ્યામ ૫

અધમ ઓધારણ ભક્તવત્સલ ટેક છે જો,
પ્રેમાનંદના સ્વામી એવા એક છે જો... ઘનશ્યામ ૬