તારા મનમાં જાણે કે
| તારા મનમાં જાણે કે દેવાનંદ સ્વામી |
પદ ૧૧ ગરબી.
તારા મનમાં જાણે કે મરવું નથી રે,
એવો નિશ્ચે કર્યો નિરધાર;
તેમાં ભૂલી ગયો ભગવાનને રે. ધ્રુવ
ધન દોલત નારી ને ઘણા દીકરા રે,
ખેતીવાડી ઘોડાને દરબાર. તેમાં○
મેડી મંદિરને ઝરૂખા ને માળિયા રે,
સુખદાયક સોનેરી સેજ. તેમાં○
ગાદી તકીયાએ ગાલ મસુરિયાં રે,
અતિ આડ્ય કરે છે એજ. તેમાં○
નીંચું કાંધ કરીને નમતો નથી રે,
એવું સાધુ સંગાથે અભિમાન. તેમાં○
મરમાળી મોહનજીની મૂરતિ રે,
તેની સાથે ન લાગેલ તાન. તેમાં○
પાપ અનેક જનમનાં આવી મળ્યાં રે,
તારીમતિ મલીન થઈ મંદ. તેમાં○
‘દેવાનંદ’ના વહાલાને વિસરી ગયો રે,
તારે ગળે પડ્યો જમફંદ. તેમાં○