પૃષ્ઠ:Adhunik Bhakti Pado and Kavitao.pdf/૧૩

"તું છે દેવી અધમ ઉરને નિત્ય ઉદ્ધારનારી,
"શું બોધે એ સુપથ તુજને બુદ્ધનો બુદ્ધિ મારી!

[અનુષ્ટુપ]

"ન ક્યારે હું મટ્યો તારો, તું મારી ન મટી જરી,
"અને મારું તથા તારું વિશ્વ આ ન મટો કદી!

"સર્વથા સર્વથા રે'જે, બુદ્ધની ધર્મભાગિની,
"વિશ્વના તાતની વ્હાલી, વિશ્વની જનની બની!

[વસંતતિલકા]

"પ્રીતિપ્રવાહ તુજ આ જગ માંહી રેડી,
"દે સૃષ્ટિનાં વિષમ સંકટ સર્વ ફેડી!
"જે દિવ્ય દ્રવ્ય કંઈ યત્નથી હું કમાયો,
"તેમાં સદૈવ ગણજે સખિ! ભાગ તારો.

[અનુષ્ટુપ]

"વિત્ત એ વિશ્વને દેવા, સર્વદા શ્રમ સેવશું,
"દયા ને સ્નેહનાં સૂત્રો, સૃષ્ટિને સમજાવશું:
"અને એ બાલ જીવોનાં, બંધનો કૈંક કાપશું,
"ઔષધિ ઉચ્ચ આપીને, મહારોગ મટાડશું.

"સાંકડી વૃત્તિને છોડી, સ્વીકારી લે ઉદારતા!
"પ્રસારી પાંખ દે તારી, આકાશે સંગ ઊડવા!

"સીમાબદ્ધ નથી શાણી! આટલું રાજ્ય આપણું,
"કુટુંબ વિશ્વમાં વ્યાપ્યું, આપણું કોટિ જન્મનું.

"મીંચી લે ચર્મચક્ષુ આ! દિવ્ય દૃષ્ટિ દઉં તને!
"સગાં ને સ્નેહી સંબંધી, જોઈ લે જગદાયલે!