આ પાનાનું પ્રુફરીડિંગ થઈ ગયું છે
મારા કેસરભીના કંથ
ન્હાનાલાલ
મારા કેસરભીના કંથ હો, સિધાવોજી રણવાટ
આભ ધ્રૂજે ધરણી ધમધમે રાજ, ઘેરા ઘોરે શંખનાદ
દુંદુભિ બોલે મહારાજના હો, સામંતના જયવાદ
મારા કેસરભીના કંથ હો, સિધાવોજી રણવાટ
આંગણ રણધ્વજ રોપિયા હો, કુંજર ડોલે દ્વાર
બંદીજનોની બિરદાવલી હો, ગાજે ગઢ મોઝાર
મારા કેસરભીના કંથ હો, સિધાવોજી રણવાટ
પુર પડે દેશ ડૂલતા હો, ડગમગતી મહોલાત
કીર્તિ કેરી કારમી રાજ, એક અખંડિત ભાત
મારા કેસરભીના કંથ હો, સિધાવોજી રણવાટ
નાથ ચડો રણઘોડલે રે, હું ઘેર રહી ગૂંથીશ
બખ્તર વજ્રની સાંકળી હો, ભરરણમાં પાઠવીશ
મારા કેસરભીના કંથ હો, સિધાવોજી રણવાટ
સંગ લેશો તો સાજ સજું હો, માથે ધરું રણમોડ
ખડગને માંડવ ખેલવાં, મારે રણલીલાના કોડ
મારા કેસરભીના કંથ હો, સિધાવોજી રણવાટ
