આ પાનાનું પ્રુફરીડિંગ થઈ ગયું છે
આવન્તાં ઝાલીશ બાણને હો, ઢાલે વાળીશ ઘાવ
ઢાલ ફૂટ્યે મારા ઉરમાં રાજ, ઝીલીશ દુશ્મન દાવ
મારા કેસરભીના કંથ હો, સિધાવોજી રણવાટ
એક વાટ રણવાસની રે, બીજી સિંહાસન વાટ
ત્રીજી વાટ શોણિતની સરિતે, હો શૂરના સ્નાનનો ઘાટ
મારા કેસરભીના કંથ હો, સિધાવોજી રણવાટ
જય કલગીએ વળજો પ્રીતમ, ભીંજશું ફાગે ચીર
નહીં તો વીરને આશ્રમ મળશું, હો! સુરગંગાને તીર
મારા કેસરભીના કંથ હો, સિધાવોજી રણવાટ
રાજમુગુટ રણરાજવી હો, રણઘેલા રણધીર
અધીરો ઘોડીલો થનગને નાથ, વાધો રણે મહાવીર
મારા કેસરભીના કંથ હો, સિધાવોજી રણવાટ
