આ પાનું પ્રમાણિત થઈ ગયું છે.
૨૦
રાતાં માતાં ને રોમ રોમે સુંવાળાં,
જાને મીઠાં ગાલ-મસૂરિયાં રે
હાલો ગલૂડાં રમાડવા જી રે!
બાને વ્હાલાં છે જેમ વીરો ને બેની
કાળવીને વાલાં કુરકુરિયાં રે
હાલો ગલૂડાં રમાડવા જી રે!
મોટાં થાશે ને મારી શેરી સાચવશે,
જાગશે રાતે બ્હાદૂરિયાં રે
હાલો ગલૂડાં રમાડવા જી રે!
ટીપૂડો દીપૂડો ડુંગરડે ઘૂમશે,
ગૌધન ભેળા વોળાવિયા રે
હાલો ગલૂડાં રમાડવા જી રે!
મોતીઓ ને માનીઓ ઝોકે રોકાશે,
વાછરૂ ને પાડરૂ ભળાવિયાં રે
હાલો ગલૂડાં રમાડવા જી રે!
