આ પાનાનું પ્રુફરીડિંગ થઈ ગયું છે
રસિયા પાટણ શહેરને પાદર
વાણીડાના હાટ છે રે લોલ
રસિયા ત્યાંથી તે વોરો રે
નવરંગ ચૂંદડી રે લોલ
રસિયા ચૂંદલડી ઓઢ્યાના
અમને કોડ ઘણા રે લોલ
રસિયા પાટણ શહેરને પાદર
મણિયારાના હાટ છે રે લોલ
રસિયા ત્યાંથી તે ઊતરાવો
નવરંગ ચૂડલો રે લોલ
રસિયા ચૂડલડો પહેર્યાની
અમને હોંશ ઘણી રે લોલ
રસિયા પાટણ શહેરને પાદર
સોનીડાના હાટ છે રે લોલ
રસિયા ત્યાંથી તે ઘડાવો
ઝાલ ઝૂમણાં રે લોલ
રસિયા ઝાલ ઝૂમણાં પેર્યાની
અમને ખંત ઘણી રે લોલ
રસિયા પીપળિયાની ડાળે
બાંધ્યો હીંચકો રે લોલ
રસિયા ઈ હીંચકડે ઝૂલીએ
આપણ બેઉ જણાં રે લોલ
