રણયજ્ઞ/કડવું ૬

વિકિસ્રોતમાંથી
← કડવું ૫ રણયજ્ઞ
કડવું ૬
પ્રેમાનંદ
કડવું ૭ →


કડવું ૬ રાગ મેઘમલાર

પ્રહસ્ત પ્રત્યે રાવણ બોલ્યો, કરી મોટું મન, મંત્રી;
હું કહું તેને આપો વહેંચી, રથ હસ્તી વાહન, મંત્રી.

વજ્ર થકી જે અશ્વ ઉપન્યા, ઈંદ્રે આપ્યા જેહ, મંત્રી;
પાંચશે ઘોડા લઈને આપો, ઈંદ્રજીતને તેહ, મંત્રી.

મહિષ મુખા તુરી સાત સહસ્ત્ર, ભેટ કીધા જમરાય, મંત્રી;
તે ઘોડા અતિકાયને આપો, અકાળ મૃત્યુ ન થાય, મંત્રી.

ગાંધર્વ જાતિના વિશ્વકર્માએ, આપ્યા સોળ હજાર, મંત્રી;
તે કુંભકર્ણ ઘેર મોકલો,વહે અયુત મણ ભાર, મંત્રી.

બે કોટી ઘોડા બળિરાજાનાં, ચાલે માયાની ચાલ, મંત્રી;
અંતરધ્યાનની વિદ્યા જાણે, તે જમાઈઓને આલ, મંત્રી.

પાંચ કોટી જે પાણી પંથા, વરૂણવાળા વીર, મંત્રી;
તે મોકલી દો દાસ સંગાથે, દોહીત્રને મંદિર, મંત્રી;

આઠ કૈટી અગ્નિના આપ્યા, ન દાઝે પાવકમાંય, મંત્રી;
તે બાણુ લાખને વહેચી આપો, જુદ્ધે સંગ લૈ જાય, મંત્રી;

નવ કોટી નવ નાગે આપ્યા, મૂકે વિષની જ્વાળ, મંત્રી;
તે ભાણેજોને વહેચી આપો, નર વાનરના કાળ, મંત્રી.

સમુદ્રના આપ્યા સપ્ત કોટી, જોતાં જળરૂપ થાય, મંત્રી;
તે સૌ પુત્રના પુત્રને આપો, લાડવાયા યુદ્ધે જાય, મંત્રી.

ત્રણ કોટી હીમાચળવાળા, મેરૂ વાળા કોટી તેર, મંત્રી;
એક કોટી ઝવેર ઝરેછે, કરી ગયા ભેટ કુબેર, મંત્રી. ૧૦

બાર કોટી મયદાનવ વાળા, જે માયાવી અપાર, મંત્રી;
ત્રિશ કોટી બ્રહ્માએ આપ્યા, જે કરે પવનનો આ'ર, મંત્રી. ૧૧

પંચાશ કોટિ સૂરજના આપ્યા, તેજ તણો ભંડાર, મંત્રી;
બેતાળીશ કોટિ મંત્રીને આપો, બે બે વે'ચી તુખાર, મંત્રી. ૧૨


ચૌદ સહસ્ત્ર અગ્નીના આપ્યા કરે અગ્નીમાંય પ્રવેશ, મંત્રી;
તે કુંભકર્ણના સુતને આપો, બોલ્યા રાય લંકેશ, મંત્રી. ૧૩

એક લક્ષ ગણપતિના આપ્યા, જેથી પહોંચે અભિલાખ, મંત્રી;
દીવીદાર આશા રાખે છે, વે'ચી આપો લાખ, મંત્રી. ૧૪

ચાર સહસ્ત્ર ચંદ્રાવળી વાજી, તાપ દીઠે જાય, મંત્રી;
મારા રથને તે જોડાવો, બોલ્યા રાવણરાય મંત્રી. ૧૫

મનુષ્યરાજા જે પૃથ્વીના, જીત્યા રાજકુમાર, મંત્રી;
સાત કોટી જે સપ્તદ્વીપના, આપો સેવકને તુખાર, મંત્રી. ૧૬

મહાદેવે પંચ લક્ષ મોકલ્યા, નંદી લાવ્યો, કાલ;
યોગીના મુને ઘટે નહીં ને, દદામીને આલ, મંત્રી. ૧૭

વાયુના આપ્યા વાયુ વેગી, ઉડી જાણે આકાશ, મંત્રી;
તે બ્રાહ્મણને સૌ વે'ચી આપો, છે સહસ્ત્ર પંચાશ, મંત્રી. ૧૮
 
ત્રણ લાખ સાંઢ પવન વેગી, ઘડીયે શત જોજન જાય, મંત્રી;
તે રાક્ષસીઓને વે'ચી આપૈ, જે જુદ્ધ કરે રણમાંય, મંત્રી. ૧૯

પ્રાગજોતિક દેશ તણા જે, સોળ સહસ્ત્ર માતંગ, મંત્રી;
મગધ દેશના એક લક્ષ છે, ગિરિવર સરખાં અંગ, મંત્રી. ૨૦

સિંગલ દીપના સાત લક્ષ છે, તેને સજાવો શણગાર, મંત્રી;
નેજાં નગારાં ઢોલ ચઢાવો, સુંઢે બાંધી હથિયાર, મંત્રી. ૨૧

ભદ્ર જાતિના ખાસ હસ્તી, ઐરાવત કુળના જેહ, મંત્રી;
વીશ સહસ્ત્ર હારમાં ચાલે છે, ઉજ્વળ જેની દેહ, મંત્રી. ૨૨

દશ લક્ષ રક્ષ વિશ્વકર્માના, અશ્વ જોતર્યા ચાર, મંત્રી;
અંગરખાં સેવકને આપો, આયુધ સહિત શૃંગાર, મંત્રી. ૨૩

બીજા રથ મહાવીરને આપો, અતિરથને માતંગ, મંત્રી;
ધ્વજા કળશ અંકુશ અંબાડી, ઘમકે ઘંટા ચંગ, મંત્રી. ૨૪

વલણ

ચંગ મૃદંગ વાજીત્ર વાગે, વિરાજે રાક્ષસ રાયરે;

ભટ પ્રેમાનંદ કહે કથા, કમ સેના યુદ્ધે જાયરે.