રસિયા જોઈ રૂપાળી

by પ્રેમાનંદ સ્વામી

રસિયા જોઈ રૂપાળી પ્રેમાનંદ સ્વામી

રસિયા જોઈ રૂપાળી કોટ,
રૂડી રેખાવળી રે લોલ;
વહાલા મારું મનડું મળવા ચ્હાય,
કે જાય ચિત્તડું ચળી રે લોલ... ૧

વહાલા તારી જમણી ભુજાને પાસ,
રૂડાં તિલ ચાર છે રે લોલ;
વહાલા તારા કંઠ વચ્ચે તિલ એક,
અનુપમ સાર છે રે લોલ... ૨

વહાલા તારા ઉરમાં વિનગુણ હાર,
જોઈ નેણાં ઠરે રે લોલ;
વહાલા તે તો જાણે પ્રેમીજન,
જોઈ નિત્ય ધ્યાન ધરે રે લોલ... ૩

રસિયા જોઈ તમારું રૂપ,
રસિક જન ઘેલડા રે લોલ;
આવો વહાલા પ્રેમસખીના નાથ,
સુંદરવર છેલડા રે લોલ... ૪