રામ રમકડું જડિયું રે

by મીરાંબાઈ

રામ રમકડું જડિયું રે મીરાંબાઈ

૧૩

રામ રમકડું જડિયું રે, રાણાજી; મને રામ રમકડું જડિયું. ટેક
રૂમઝુમ કરતું મારે મંદિરે પધાર્યું;
નહિ કોઈના હાથે ઘડિયું રે; રાણાજી∘
મોટા મોટા મુનિજન મથી મથી થાક્યા;
કોઈ એક વિરલાને હાથે ચડિયું રે; રાણાજી∘
સૂના શિખરના ઘાટથી ઉપર;
અગમ અગોચર નામ પડિયું રે;રાણાજી∘
બાઈ મીરાં કહે પ્રભુ ગિરધર નાગર;
મન મારું શામળિયા સંગ જડિયું રે; રાણાજી∘

અન્ય સંસ્કરણ

રામ રમકડું જડિયું રે, રાણાજી;

મને રામ રમકડું જડિયું.

રૂમઝૂમ કરતું મારે મંદિરે પધાર્યું;
નહિ કોઈના હાથે ઘડિયું રે;

મને રામ રમકડું જડિયું.

મોટા મોટા મુનિવર મથી મથી થાક્યા;
કોઈ એક વિરલાને હાથે ચડિયું રે;

મને રામ રમકડું જડિયું.

સૂના શિખરના ઘાટથી ઉપર;
અગમ અગોચર નામ પડિયું રે;

મને રામ રમકડું જડિયું.

બાઈ મીરાં કહે પ્રભુ ગિરધર નાગર;
મન મારું શામળિયા સંગ જડિયું રે;

મને રામ રમકડું જડિયું.