સગપણ સાચું જાણે શ્રી ઘનશ્યામનું રે
| સગપણ સાચું જાણે શ્રી ઘનશ્યામનું રે દેવાનંદ સ્વામી |
સગપણ સાચું જાણે શ્રી ઘનશ્યામનું રે
સગપણ સાચું જાણે શ્રી ઘનશ્યામનું રે,
કેવલ બીજું માને કુડેકુડ રે,
સગા સંબંધી સ્વારથ કેરાં સોબતી રે,
મેલી જાસે મુખમાં નાખી ધુડ્ય રે... સગ ૧
દેશવિદેશે ડોલે ધનને કારણે રે,
પ્રભુ વિસારી લાલચમાં લપટાય રે,
ભાગ્ય વિનાનો ભટકે પામર પ્રાણીયો રે,
જોને તારું જીવત એળે જાય રે... સગ ૨
કાલ અચાનક ફોજું આવે કારમી રે,
ઘેરી લેવે ઘાટો ઘરનું બાર રે,
નાડી તૂટે આંખ્યું બાર્યે નીસરે રે,
તે ટાણે શામળિયો કરતલ સાય રે... સગ ૩
એટલા સારુ કરજે એનો આશરો રે,
માથે પડતાં મટશે જમના માર રે,
દેવાનંદ કહે દાસપણામાં લાભ છે રે,
પ્રેમ કરીને રાખો મનમાં પ્યારા રે... સગ ૪