આ તે શી માથાફોડ !/૧૦૯. કોઈ વાર પડદા પાછળથી જોશો ?

by ગિજુભાઈ બધેકા

← ૧૦૮. તમારું બાળક તમને કહે કે —

આ તે શી માથાફોડ ! ૧૦૯. કોઈ વાર પડદા પાછળથી જોશો ? ગિજુભાઈ બધેકા

૧૧૦. ચંપાનો નિશ્ચય →

: ૧૦૯ :
કોઈ વાર પડદા પાછળથી જોશો ?

⁠ટ્યૂશન આપવા માટે રાખેલ શિક્ષક તમારા બાળકને ભણાવે છે કે બાળકને જે તે લખાવી તે પોતે છાપું વાંચે છે ?

⁠ખાનગી માસ્તર છોકરાંઓ પાસેથી ઘરની છાની વાતો કઢાવી શેઠ-શેઠાણીને રાજી કરવા માટે તેનો કેવો ઉપયોગ કરવો તેની ખટપટમાં પડ્યો છે ?

⁠કોઈ ન હોય ત્યારે માસ્તર “શેઠને કહી માર ખવરાવીશ” એવી ધમકી છોકરાંઓને આપી તેમની પાસે લેસન કરાવે છે ને પોતાની મહેનત ઓછી કરે છે ? માસ્તર છોકરાંની સાથે ભાઈબંધી કરવાના પ્રયત્નમાં પડેલ છે કે જેથી પોતાનો પગાર વગેરે વધારવામાં છોકરાંની પણ મદદ મળે ?

⁠માસ્તર તોફાની છોકરાંઓની ખુશામત કરે છે ને તેને ભણાવી શકતો નથી અને છતાં દેખાવ રાખે છે કે પોતે ભણાવે છે ?

⁠માસ્તર સાચેસાચ પૈસા લીધા હોય તેના પ્રમાણમાં ખરા અંતઃકરણથી સારી રીતે બાળકોને ભણાવવા મહેનત કરે છે ?

❊