આ તે શી માથાફોડ !/૧૧૬. બતાવો તો ?
| ← ૧૧૫. હું કહું ત્યારે કરજે | આ તે શી માથાફોડ ! ૧૧૬. બતાવો તો ? ગિજુભાઈ બધેકા |
૧૧૭. કોણ વધારે કેળ્વાયા છે ? → |
બતાવો તો ?
બતાવો તો ?
બાળકને પક્ષીઓની સુંદર વાતો કહેવાને બદલે તેને સુંદર પક્ષીઓ બતાવો તો ?
બાળકને એન્જિનની કરામત પાટિયા પર સમજાવવાને બદલે તેને એન્જિન પાસે જ લઈ જઈ બતાવો તો ? બાળકને પૃથ્વીના ગર્ભમાં અનેક ખનિજો ભરેલાં છે તેની રસિક કથા કહેવાને બદલે ખનીજભરપૂર પૃથ્વી ખોદી બતાવો તો ?
બાળકને ઘરમાં પડયાં પડયાં તારાઓની વાતો કહેવાને બદલે ફળિયામાં કે અગાશી પર લઈ જઈ તારાઓ બતાવો તો ?
બાળકે કશાથી બીવું નહિ, બીવા જેવું કશું નથી, એમ તેને કહેવા કરતાં તેને સાથે લઈ અંધારામાં ફરવા નીકળો અને ભયનાં સ્થાનોમાં નિર્ભયતા બતાવો તો ?
બાળકે મોટો થયા પછી મોટા મોટાં કામો કરવાં, બહાદુર ને હોશિયાર થવું, એવી શબ્દથી પ્રેરણા પાવા કરતાં તેના નાનાં નાનાં બહાદુરી અને હોંશિયારીના કામો કરવાનું બતાવો તો ?
બાળકને દેશના લાખો ગરીબોની વાતો કરવા કરતાં તેને ગરીબોનાં ઝૂંપડાં બતાવો તો ?
બાળકને પોતાના નોકરોને મારીઝૂડીને તેની પાસેથી કામ કરાવતા શેઠો અને કારખાનાના કામદારોની વાતો કહેવા કરતાં તે શેઠો, કામદારો અને કારખાનાં બતાવો તો ?
તો બાળક વધારે સારું નહિ કેળવાય ?