આ તે શી માથાફોડ !/૧૨. બે રીતો

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← ૧૧. રતુને કેમ મારે છે ? આ તે શી માથાફોડ !
૧૨. બે રીતો
ગિજુભાઈ બધેકા
૧૩. સંધ્યા ટાણે →


કેમ બા, રમીને આવી કે? આજ શેની રમત રમ્યાં ? લે જરા કામમાં મદદ કરીશ કે ? આ એક એંઠવાડ પડ્યો છે તે તું કાઢ ત્યાં હું શાક સમારું; ને પછી આ ધોયેલાં કપડાં સંકેલી નાખ એટલે આપણે ફરવા જઈએ. આજ કાંઈ 'લેસન' આપ્યું છે ? આજે વાળુ કરીને લેસન વહેલું કરી લેજે. પછી આપણે સવાર માટે દાળ વીણી કાઢશું. પહેલું લેસન કરી લે એટલે પછી નિરાંત.

આ રખડીને આવી ! કામ નહિ, કાજ નહિ ને દિ' આખો રખડ રખડ ! લ્યો હવે એંઠવાડ કાઢો. આ સવારની સંજવારી પડી છે તે કોણ કાઢશે ? આ લૂગડાં તો બધાં રખડે છે ! જરાક ભેગાં કરીને તો મેલ એક ભણતાં આવડ્યું છે, ને એક પટપટ જવાબ દેતાં આવડ્યું છે ! ઈ મારે ભણતર નથી જો'તું. ભણીને ક્યાં રોટલો રળવો છે કે ભણાવવા જવું છે ? જઈશ મા કાલથી ભણવા; ને જાવું હોય તો પહેલું કામ ને પછી ભણતર !