એકતારો/નગરની રોશની નિરખવા નીકળ્યાં

વિકિસ્રોતમાંથી
Jump to navigation Jump to search
← મને મારનારા ગોળી છોડનારા એકતારો
નગરની રોશની નિરખવા નીકળ્યાં
ઝવેરચંદ મેઘાણી
ગરજ હોય તો આવ ગોતવા . →


[ ૮૨ ]

શૉફરની દિવાળી
O
: ઝૂલણા :


નગરની રોશની નીરખવા નીકળ્યાં
શેઠ શેઠાણી ને સાત છૈયાં;
ચકચકિત મોટરે દીપકો અવનવા,
હાર ગલફુલ સજ્યાઃ થૈ થૈ થૈયાં ! ૧.

થૈ થૈ થૈ ડોલતી ચાલમાં ચાલતી
ગાડીને જોઈ જન કૈંક મોહે;
આગલી પાછલી ગાડીના ગર્વને
મોડતી હાથણી જેમ સોહે. ૨.

આપણા રાવ શૉફર તણી હાંકણી !
ભલભલી મૂછના વળ ઉતારે;
વાંક ને ઘોંકમાં શી સિફત ખેલતો
ફાંકડો રાવ નટવી નચાડે ! ૩.

શેઠના પેટમાં બિન્દુ પાણી હલે,
છાતી શેઠાણીની લેશ થડકે,
(તો) ફાંકડા રાવના હાથ લાજે–અને
રાવને હૃદય બદનામ ખટકે ! ૪.

[ ૮૩ ]

'રાવ, મોટર જરી બગલમાં દાબ તો !’
શેઠનાં નયન સૌંદર્ય શોધે;
'રાવ, સરકાવ ગાડી જરી પાછળે.'
શેઠ–પત્ની ઢળે રૂપ જુદે. પ.

ચાર દિવસો તણી ચમકતી પર્વણી :
ચિત્રપટ, નાટકો ને તમાશા :
'સાલ નવ મુબારક’ કાજ અહીં તહીં બધે
ઘૂમિયાં પલટી પોશાક ખાસા. ૬.

થાક આનંદનો લાગિયો, શેઠિયાં
બીજનો દિન ચડ્યો તોય સૂવે :
રાવ મોટર તળે જાય ઓજાર લૈ :
પોઢવા ?— નૈ જી, પેટ્રોલ ચૂવે ! ૭.

'શું થયું. રાવ ! ગાડી બગાડી નવી !
આમ બેધ્યાન ક્યાં થઈ ગયો'તો ?'
‘દીપમાલાની સ્વારી વિષે શેઠજી !
એક દીવો તહીં ગુલ થયો'તો’. ૮.

'કયાં ?'–'તહીં એક અંધારગલ્લી તણી
'ચાલની આખરી ઓરડીમાં,
'નાર મારી અને બાળ બે ગોબરાં
‘ચાર રાત્રી સુધી વાટ જોતાં, ૯.

[ ૮૪ ]

'બારીએ લાલટિન લટકતું રાખજે,
'આવી પ્હોંચીશ. આજે હું વે'લો :
'વાટ જોતાં મળી આંખ એની હશે,
'તેલ ખૂટ્યું હશે–હું ય ઘેલો ૧૦.

‘દીપમાલા ત્યજી ત્યાં નિહાળી રહ્યો,
'પીઠથી ગાડીએ દીધ ઠેલો,
'પાંસળાંમાં ખુતી સોટી સાર્જન્ટની,
'હેબતે હું ઘડી ભાન ભૂલ્યો.' ૧૧.

'હા અલ્યા રાવ ! અફસોસ, હું યે ભૂલ્યો,
'તાહરે પણ હતી કે દિવાળી ?
'શી ખબર, તું ય પરદેશમાં માણતો
'નારબચ્ચાંની સોબત સુંવાળી !' ૧૨.

એમ કહી શેઠીએ આઠઆની દીધી
ને દાધી શીખ અણમૂલ આખી:
‘ગાંડિયા ! આંહીં તો એકલા કામીએં
'આ બધી લપ્પને વતન રાખી.' ૧૩..