કલાપીનો કેકારવ/સનમની યારી
| ← સનમને | કલાપીનો કેકારવ સનમની યારી કલાપી |
સનમની શોધ → |
સનમની યારી
યારી કરૂં ત્હારી ? કરૂં યા ના ? સનમ!
કોઈ ખુવારીથી ડરૂં યા ના ! સનમ !
તુજ તાજ કાંટાનો ઉપાડી લે, સનમ !
ખૂને ઝરે કૈં આલમો, ત્યારે, સનમ !
છે સોઈ તુંને કે નહીં દિલદારની ?
તુંને નઝર આ દિલ કરૂં યા ના ? સનમ !
કોઈ દીવાનો મસ્ત હો, લાચાર હો,
તેને રજા દરબારમાં યા ના ? સનમ !
મારે ટકોરે દ્વાર ખુલ્લે કે નહી,
ત્હારી પુકારૂં શેરિયે યા ના ? સનમ !
છે શોખ મિજમાનો ફકીરોનો ન યા ?
કૈં ઝિદ કરૂં દરવાનથી યા ના ? સનમ !
તકલીફની પરવા ન પીવા આવતાં,
હાથે મગર તું પાય છે યા ના ? સનમ !
લાખો જવાહિરો જહાં તુંને ધરે,
રાની કરૂં ત્યાં ગુલ રજુ યા ના ? સનમ !
જ્યાં લાખ ચશ્મો ચૂમતાં ત્હારા કદમ,
ત્યાં ભેટવા દોડું ત્હને યા ના ? સનમ !
નાલાયકી ને બેવકૂફી યારની,
ત્યાં તું શરાબીમાં ભળે યા ના ? સનમ !
શાહી ફકીરીથી ભળી જાણી નહીં,
દિલ ત્હોય ચાહે ચાહવું યા ના ! સનમ !
જોઈએ ત્હને ચશ્મે ઝરે છે ખૂન તે
ત્હારી હિનામાં રેડવું યા ના ? સનમ !
તું છે બધું, હું કાંઈ એ છું ના , મગર
યારી કરૂં ત્હારી ? કરૂં યા ના ? સનમ !
૧૮૯૯