કુસુમમાળા/મેઘગર્જન

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← લાગટ હૅલી ઊઘડતી વખતની રચના કુસુમમાળા
મેઘગર્જન
નરસિંહરાવ દિવેટિયા
પ્રભાત →


[રાગ સોરઠ, તાલ ઝંપા]

પ્રિય! સુણ્ય તું, પેલી નભ ચુમ્બતી
ગિરિમાળ પાછળ નાદ શો?
કંઈં કુપિત સિંહ ગિરિગવ્હરે
ત્રાડતો ધરી ઉન્માદ શો?
પ્રિય! સુણ્ય તું૦ ૧

ન હોય કેશરિનાદ ગભીરો,
એ તો ગર્જતો ધન ધીરો,
સુગન્ધમય જો શીત સમીરો
અહિં આવી દે સુખસ્વાદ શો!
પ્રિય! સુણ્ય તું૦ ૨

રવિપ્રભા ચુમ્બી ઘનરાયે
ઉપજાવ્યું સુન્દર નભમાંહે
રંગીલું ઈન્દ્રધનુ આ એ
વિલસે ધરી આલ્હાદ શો!
પ્રિય! સુણ્ય તું૦ ૩

મત્ત બન્યો જો આ મોરલિયો
કેકારવ કરી નાચે અલી ઓ!
મેઘનાદશું રવ તે મળિયો, -
સુણી મન ઊઠે પ્રતિનાદ શો!
પ્રિય! સુણ્ય તું૦ ૪

-૦-

ટીકા

કડી ૨. સમીરો- (બહુવચન) 'આવી' અને 'દે'નો કર્તા.

કડી ૪. સૂણી મન ઊઠે પ્રતિનાદ શો - કેકા તથા મેઘનાદ સાંભળીને મનમાં ગમ્ભીર આનન્દની ઊર્મિ ઉત્પન્ન થાય તે પ્રતિનાદ.

-૦-