નિહારિકા/નયનનૃત્ય
< નિહારિકા
| ← કવિતા | નિહારિકા નયનનૃત્ય રમણલાલ દેસાઈ |
ઘેલી ગોપી → |
નયનનૃત્ય
રાહ નંદજીનો છેલો જાદુનો ભરેલો
નયન નયન નાચે ! હે સૃજન સકલ રાચે.
સૃજન સકલ રાચે, હો નયનમંત્ર વાંચે !
નયન નયન નાચે—
નાચે પર્ણવેલી, હો રેલી રસની હેલી.
નયનનૃત્ય તાલમાં જો તારિકાઓ ઘેલી !
નયન નયન નાચે—
સરિત લલિત લાસ્યમાં, જો ચન્દ્રી હાસ્યમાં.
તાંડવની ભવ્ય તાલી લે નિધિ ઉલ્લાસમાં !
નયન નયન નાચે—
પોયણાં ઝઝમે, હો લલિત લહર ચૂમે.
બુલબુલોની બેલડી વિરાજે પુષ્પ લૂમે.
નયન નયન નાચે—
આંખ તણા ચાળા, જો પાડે ઉર ઉછાળા.
તો દિવ્ય નાચમાંહી ચાલો વિસ્મયે રસાળા !
નયન નયન નાચે—