ન્હાના ન્હાના રાસ/પુનમની પગલીઓ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← પારકાં કેમ કીધાં? ન્હાના ન્હાના રાસ - ભાગ ૨
પુનમની પગલીઓ
ન્હાનાલાલ કવિ
પૂર્ણિમા પાછી ઉગીરે →


  
સખિ ! જોને ગગનને ગોખ રે પુનમની પાંખડીઓ,
કાંઈ નગર-નગરને ચોક પુનમની પાંખડીઓ;
સખિ ! સરોવરે પોયણાંને ભાલ રે પુનમની પાંખડીઓ,
કાંઈ તોરણે બાંધી ત્રિલોક પુનમની પાંખડીઓ.

અહો ! અમુલખ અવસર આજ રે પુનમના પડછન્દા,
સુણ સજનિ ! આ ચન્દનીને છોળ પુનમના પડછન્દા;
ત્‍હારી ઉડન્તી આંખડીને ભાવ રે પુનમના પડછન્દા,
ત્‍હારા અંગઅંગ કેરે હિન્ડોળ પુનમના પડછન્દા.

આ સરિતાની લહેરે લહેરે રે પુનમની પાંખડીઓ,
કાંઈ સુન્દરી-સુન્દરીને દેહ પુનમની પાંખડીઓ,
વેરે પગલીએ-પગલીએ પ્રાણ રે પુનમની પાંખડીઓ,
કાંઇ નયણેથી નીતરતે નેહ પુનમની પાંખડીઓ.

અને સહિયર સમાણી ! ત્‍હારે રાસ રે પુનમના પડછન્દા,
ત્‍હારે તાળી-તાળીને મદશોર પુનમના પડછન્દા,
ત્‍હારા સૌભાગ્યકંકણે હસન્ત રે પુનમના પડછન્દા,
ત્‍હારા હૈયાને ટહુકતે મોર પુનમના પડછન્દા.

મ્હારા પિયુજીના હાસને પુંજ રે પુનમની પાંખડીઓ,
મ્હારા નાથની કીકીને કુંજ પુનમની પાંખડીઓ;
મ્હારાં બાલકડાંને કલબોલ રે પુનમના પડછન્દા,
મ્હારા સારા સંસારને કલ્લોલ પુનમના પડછન્દા.
-૦-