ન્હાના ન્હાના રાસ/શતદલ પદ્મ

વિકિસ્રોતમાંથી
← વ્હાલપની વાંસલડી ન્હાના ન્હાના રાસ - ભાગ ૨
શતદલ પદ્મ
ન્હાનાલાલ કવિ
શરદનાં અજવાળિયાં →




શતદલ પદ્મ

ન્હાના ન્હાના રાસ

શતદલ પદ્મમાં પોઢેલો
હો! પરિમલ દાખવો, હોય જો દીઠેલો.

શોધ્યાં સરોવર, શોધી ફૂલવાડીઓ;
શોધી રસકુંજ જ્યાં રમેલો;
શોધી આયુષ્યની મ્હોરી અમરાઈઓ,
દેઠો ન દુનિયાં ફોરેલો;
હો! પરિમલ દાખવો, હોય જો દીઠેલો.

ફૂલડે ફૂલડે વસન્ત શો વસેલો,
પાંખડી પાંખડી પૂરેલો;
ભ્રમર ભ્રમર કીધ સંગીતસોહામણો
પંખીડે પંખીડે પોઢેલો:
હો! પરિમલ દાખવો, હોય જો દીઠેલો.

અડઘેરી પાંદડીઓ વીણતમાં વેરી, ને
આસવ ડોળિયો અમોલો:
હૈયાના ધૂપ સમો ઊડતો બતાવો કોઈ
જીવન પરાગ જગતઘેલો:
હો! પરિમલ દાખવો, હોય જો દીઠેલો.

શતદલ પદ્મમાં પોઢેલો
હો! પરિમલ દાખવો, હોય જો દીઠેલો.