પદ ૭ રાગ એજ.
વિવેકી નરને, એમ વિચારીને જોવું;
કુપાતરને દાન દેવું તે, બીજ ખારમાં બોવું રે... વિવેકી꠶ ૧
કામી ક્રોધી લોભી લંપટ, કૂડા બોલા કા’વે;
અન્ન ધન વસ્ત્ર તેને આપે, તે શેકી(ને) બી વાવે રે... વિવેકી꠶ ૨
ઇંદ્રી પાંચ છઠ્ઠું મન જીત્યા, તે હરિદાસ કહાવે;
વા’લી વસ્તુ એને આપે, અનંત ગણી થઈ આવે રે... વિવેકી꠶ ૩
દુર્બળ સુદામે આણી દીધા, મુષ્ટી તાંદુલ મેવા;
કંચન મો’લ કર્યા સુખકારી, સંત પુરુષની સેવા રે... વિવેકી꠶ ૪
દ્રૌપદીએ નિજ ચીર વધેરી, બાંધ્યું હરિને હાથે;
દેવાનંદ કહે ભરી સભામાં, આપ્યાં દીનાનાથે રે... વિવેકી꠶ ૫
પદ ૮ રાગ એજ.
ગાફલ બેગરજુ, આ તન એળે ગમાયો;
ધર્મ વિસારી ધંધે વળગ્યો, કૂડે ધૂડ્ય કમાયો રે... ગાફલ° ૧
કામનિયુંમાં ફરતો ડોલે, વિષય ભરેલી વાતું;
પાપ કરીને પૂરું બાંધ્યું, ભવસાગરનું ભાતું રે... ગાફલ° ૨
દેવમંદિરમાં દર્શન કરવા, ભૂલ્યો ભટક્યો આવે;
માનનિયુંનાં મુખ જોવાને, આંખડિયું અટકાવે રે... ગાફલ° ૩
આરત્ય રાખી ના ઉચ્ચારે, રામકૃષ્ણ મુખ વાણી;
ગ્રામ્યકથામાં દીએ ગપોડા, જૂઠે જૂઠું જાણી રે... ગાફલ° ૪
ગાંજો ભાંગ્ય લીલાગર મફર, હોકો પીવે ચાવે;
દેવાનંદ કહે દેખ વિચારી, દુઃખનો અંત ન આવે રે... ગાફલ° ૫
