પદ ૯ રાગ ગરબી.
કર પ્રભુ સંગાથે દ્રઢ પ્રીતડી રે,
મરી જાવું મેલીને ધનમાલ;
અંતકાળે સગું નહિ કોઈનું રે... ○ટેક
સંસ્કારે સંબંધી સર્વે મળ્યાં રે,
એ છે જૂઠી માયા કેરી જાલ... અંતકાળે○ ૧
મારું મારું કરીને ધન મેળવ્યું રે,
તેમાં તારું નથી તલભાર... અંતકાળે○ ૨
સુખ સ્વપ્ના જેવું છે સંસારનું રે,
તેને જાતાં ન લાગે વાર... અંતકાળે○ ૩
માટે સેવે તું સાચા સંતને રે,
તારા ટળશે ત્રિવિધના તાપ... અંતકાળે○ ૪
અતિ મોટાપુરુષને આશરે રે,
બળે પૂર્વ જનમનાં પાપ... અંતકાળે○ ૫
એવું સમજીને ભજ ભગવાનને રે,
સુખકારી સદા ઘનશ્યામ... અંતકાળે○ ૬
દેવાનંદનો વહાલો દુઃખ કાપશે રે,
મનવાંછિત પૂરણ કામ... અંતકાળે○ ૭
પદ ૯ રાગ ગરબી.
મળ્યો મનુષ્ય દેહ ચિંતામણિ રે,
તારા અંગમાં છે રોગ અસાધ્ય;
નથી લેતો નારાયણ નામને રે... ટેક
માથે જન્મમરણ મોટું દુઃખ છે રે,
તારા અંતરમાં હરિને આરાધ્ય... નથી ૧
ઘણું સૂઝે છે કામ સંસારનું રે,
કરે સગાંનું નિત્ય [બહુ] સનમાન... નથી ૨
હેત કરતો નથી હરિદાસમાં રે,
હૈયા ફૂટ્યા તું લૂણહરામ... નથી ૩
પરનારી સંગાથે કરી પ્રીતડી રે,
તારો એળે ગયો અવતાર... નથી ૪
બહુનામીની બીક નથી રાખતો રે,
ખરે ખાંતે મળીશ ખુવાર [તેમાં ખ્વાર] નથી ૫
અતિ કઠણ વેળા છે અંતકાળની રે,
પછી થાશે તને પસ્તાવ... નથી ૬
દેવાનંદની શિખામણ માનજે રે,
તારા અંતરમાં કરીને ઉછાવ... નથી ૭