આ પાનું પ્રમાણિત થઈ ગયું છે.
૩૨
નીંદરને સાદ
હું તો સાદ પાડી પાડી શોધી રહી,
નીંદર ! આવો રે મારા ભઇલાની સેજ !
નીંદરડી ! વીરો મારો સૂતો નથી !
તમે કોણ રાજાની મોલાતે રહો ?
કોની કુંવરીના તાણો ફુલ-હીંડોળ !
નીંદરડી ! વીર મારો સૂતો નથી.
હું તો રાજાના મોલુંમાં રહેતી નથી,
નવ તાણું રે કો'ના ફુલ-હિંડોળ !
નીંદરડી ! વીર મારો સૂતો નથી.
હું તો ઝૂંપડે ઝૂલાવું પારણીયાં,
હું તો હીંચોળું થાક્યાં દીનનાં બાળ;
નીંદરડી ! વીર મારો સૂતો નથી.