રસિકવલ્લભ/પદ-૩૬

by દયારામ

આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.

← પદ-૩૫

રસિકવલ્લભ પદ-૩૬ દયારામ

પદ-૩૭ →

<poem>

પદ ૩૬ મું

નામ રૂપ અને ગુણે કરીને ભેદની ઉત્પત્તિ નામ રૂપ ને ગુણ કરી ભેદજી, સકળ રૂપ શ્રીહરિ કહે વેદજી; વિચિત્ર લીલા રચી સમર્થેજી; રમણ પોતાને કરવા અર્થેજી. ૧

સકળ સદૃશ તું લે હરિ જોઈજી, હરિ સદૃશતા ન મળે કોઈજી; આદ્ય તે એકા રહે હરિ જેહજી, મધ્યે બાહ્ય રૂપે પણ તેહજી. ૨

ઢાળ તેહ જ સકલા સર્વત્ર કારણ, કાર્ય ભેદ અભેદ; તું નામ રૂપ વિનાશ કહે છે, તે વૃથા કહેછે વેદ. ૩

પોતે જ રચના રૂપ હરિ , પોતે જ જાય અનૂપ; ચિત્ત શુદ્ધથી નિરખતાં, ભાસે વિલાસ છે તદ્રૂપ. ૪

શિષ્યની શંકા સુણી એમ બોલ્યા શિષ્ય, ગુરુ મુજ સંદેહ ઉપનો એક; સર્વત્ર હરિ તો શ્રેય ક્યમ નહિ, જ્યહાં ત્યાહાં કરતાં સ્નેહ. ૫

ગુરુએ આપેલો ઉત્તર કરી શ્રવણ ગુરુ બોલિયા, તુંને સંશય ઉપનો સત્ય; પણ શ્રવણ કર્ય શંકા ટળે, નિશ્ચલિત રાખી મત્ય. ૬

ગંગાના દૃષ્ટાંતે બ્રહ્મનાં ત્રણ રૂપો ભૌતિક આધ્યાત્મિક ને, આધિદૈવિક હરિ ત્રિરૂપ; જ્યમ ગંગાવારી તીર્થ દેવી, ક્રમ વિવેક અનૂપ. ૭ એક રૂપ ત્રણે સુરસરી, વ્યવહાર જુદો જ્યંમ; જળ જક્ત તીર્થ અંતર્યામી, દૈવી પુરુષોત્તમ. ૮ -૦-