વેણીનાં ફૂલ/પારેવાં લ્યો
| ← બોલે મોરલો | વેણીનાં ફૂલ પારેવાં લ્યો ઝવેરચંદ મેઘાણી ૧૯૨૮ |
નીંદરભરી → |
પાળે ઘુમે પારેવડાં પારેવાં લ્યો,
ટોડલે ઘૂમે મોર, માના જનમ્યા ! પારેવાં લ્યો.
પાંચ ધોળાં પાંચ વાદળી પારેવાં લ્યો,
આંખડી રાતી ચોળ, માના જનમ્યા ! પારેવાં લ્યો.
આંગણીયે પગ પાડતાં પારેવાં લ્યો,
ધૂળમાં ગૂંથે ફુલ, માના જનમ્યા ! પારેવાં લ્યો.
ઘેરૂં ઘેરૂં કાંઈ ઘઘવે, પારેવાં લ્યો,
લીલી ફુલાવે ડોક માના જનમ્યા ! પારેવાં લ્યો.
જોડલું જૂદું થાય નૈ, પારેવાં લ્યો,
રોજ પારેવી સંગ માના જનમ્યા ! પારેવાં લ્યો.
આભને આરે ઉડતાં પારેવાં લ્યો,
પોઢતાં પૃથવી માંય માના જનમ્યા ! પારેવાં લ્યો.
અસળ ધાન આરોગતાં પારેવાં લ્યો,
નીકર કાંકરી ખાય, માના જનમ્યા ! પારેવાં લ્યો.
ચબૂતરે એનાં બેસણાં પારેવાં લ્યો,
રાજમોલુંને ગોખ માના જનમ્યા ! પારેવાં લ્યો.
બેનીબાએ બોલાવીયાં પારેવાં લ્યો,
તીતી ! તીતી ! બોલે માના જનમ્યા ! પારેવાં લ્યો.
આંગળીએ ઉડી બેસતાં પારેવાં લ્યો,
હથેળીએ ચણ ખાય માના જનમ્યા ! પારેવાં લ્યો.
ઝીણી ઝીણી ચાર ઝાંઝરી, પારેવાં લ્યો,
ઘૂઘરીઆળી ઘડાવો માના જનમ્યા ! પારેવાં લ્યો.
ભાભલડી પે’રાવશે પરેવાં લ્યો,
પારેવડાંને પાય માના જનમ્યા ! પારેવાં લ્યો.
રૂમઝુમન્ત નેવલે પારેવાં લ્યો,
ઓસરીએ ઘમકાર માના જનમ્યા ! પારેવાં લ્યો.