આ તે શી માથાફોડ !/૪. બાળકની દ્રષ્ટિએ કાગા લઈ ગ્યા !

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← ૩. ગજુડો આ તે શી માથાફોડ !
૪. બાળકની દ્રષ્ટિએ કાગા લઈ ગ્યા !
ગિજુભાઈ બધેકા
૫. મારી બાને ખબર ન પડે, હો ! →


રમુ નાની હતી ત્યારે એની બા એની પાસેથી કંઈક લેવું હોય તો લઈ લે અને કહે : "કાગા લઈ ગયા, કાગા લઈ ગ્યા !”

રમુએ 'કાગા લઈ ગ્યા !' એનો અર્થ અનુભવથી શોધી કાઢ્યો હશે.

રમુ ચાર વર્ષની થઈ છે, કમુ બે વરસની છે, કમુ પાસેથી કંઈ લઈ લેવું હોય તો રમુ લઈ લે છે ને કહે છે: "કાગા લઈ ગ્યા, કાગા લઈ ગયા !”

ધીરે ધીરે કમુએ 'કાગા લઈ ગ્યા !'નો અર્થ શોધી કાઢ્યો લાગે છે.

ગઈ કાલે બટેટાં પડ્યાં હતાં. કમુએ બેટેટાંને ફરાકની ખોઈમાં ભર્યા; કોઈ ન દેખે એવી રીતે ઢાંક્યાં. પછી બધાની સામે જોઈને કહેઃ "કાગા લઈ ગ્યા, કાગા લઈ ગ્યા !”

લાગે છે રમુ એની બાથી છેતરાઈ નહિ હોય; કમુ રમુથી છેતરાઈ નથી. 'કાગા લઈ ગ્યા !' એટલે સંતાડી દીધું.

સંતાડી દેવાનો આ પ્રયોગ ગમ્મત ભરેલો છે.

*