કલ્યાણિકા/દેવનો મોક્ષ

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← મુસાફર કલ્યાણિકા
દેવનો મોક્ષ
અરદેશર ખબરદાર
પ્રભુની પ્રીત →
. રાગ આસા - માઢ - ત્રિતાલ*[૧].



છૂટી રે ગયા હો દેવ છૂટી રે ગયા :
મારું મંદિર તૂટ્યું ને દેવ છ્ટી રે ગયા !-(ધ્રુવ)

સોનલ સિંહાસનમાં દેવ બેસાડ્યા રે :
કોણ જાણે એ ક્યારે ઊઠી રે ગયા ?
મારું મંદિર તૂટ્યું₀ ૧

ફૂલડાં ચઢાવ્યાં મોંઘાં, ધૂપ ધૂપાવ્યાં રે :
દિન દિનનાં અર્ચન મારાં લૂંટી રે ગયા !
મારું મંદિર તૂટ્યું₀ ૨

હીરા મોતીએ હુલવ્યા, તોય રહ્યા નહીં રેઃ
ભવનના ભંડાર મારા ખૂટી રે ગયા !
મારું મંદિર તૂટ્યું₀ ૩

મારે તમારે વહાલા ! અંતરનું સાટું રે :
તનમનના તાર ક્યમ એ તૂટી રે ગયા ?
મારું મંદિર તૂટ્યું₀ ૪

આવો રે અદ્દલ સ્વામી ! અંતરમાં ધારું રે :
સ્નેહ કેરા લેખ શાને ઘૂંટી રે ગયા ?
મારું મંદિર તૂટ્યું₀ ૫

નોંધ

  1. * "જૂનું તો થયું રે દેવળ જૂનું તો થયું" -એ મીરાંબાઈના ભજનની રાહ..
-૦-