ગુજરાતની ગઝલો/જુદો છે!
| ← નિજાનંદ | ગુજરાતની ગઝલો જુદો છે! [[સર્જક:|]] ૧૯૪૩ |
ગઝલરૂપ ! → |
ફકીર
કહું હું શું અહીં–મુજ દિલતણો હર તાર જુદો છે,
અને ફરિયાદનો હર તારમાં પોકાર જુદો છે.
ન પીતે હું મદિરા-પણ, અહીં પાનાર જુદો છે;
ન સુણતે લેશ–કિંતુ, ગીતનો ગાનાર જુદો છે.
જમાવું છું હવે હું સૂર-દિલના તાર તોડીને;
કલેજું હાથમાં છે, આજ સાંભળનાર જુદો છે.
હતી નીચી નજર એની–મગર, મીઠી નજર એની;
સકળ સંસારથી એ યાર બેદરકાર જુદો છે.
પ્રપંચોથી ભરી દુનિયા, વિલાસોની નથી સીમા;
અસંગત પાર સાગર વીંઝતો તરનાર જુદો છે..
ન જીવું સારહીન જગમાં, મગર બંધન વફાનાં છે;
અમારી જિંદગીને જીવવામાં સાર જુદો છે.
જુદાઈના ભરૂં છું દમ, ગુમાન છે તને હર-દમ;
ન કહેજે તું મને હમદમ, કે મારો યાર જુદો છે.
સદા સૂતો રહ્યો હું સ્વપ્ન જોતો જાગૃતિઓનાં;
જીવન વીતી ગયું કિંતુ-અહીં ભણકાર જુદો છે.
હયાએ શિર ઝુકાવીને અદાથી શું કહ્યું એવું
કે સૌ ઇકરારથી પર આજનો ઇકરાર જુદો છે.
મિલન-આશા ભલે જૂઠી, મગર એની જુદાઈમાં;
કહું કોને જઈને હું, કે મારો પ્યાર જુદો છે.