ન્હાના ન્હાના રાસ/જરા થોભ

by ન્હાનાલાલ કવિ

આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.

← કાળની ખંજરી

ન્હાના ન્હાના રાસ - ભાગ ૨ જરા થોભ ન્હાનાલાલ કવિ

જાવા દ્યો, જોગીરાજ! →

  
ચન્દ્ર ! જરા જાતાં-જાતાં તો બાપુ ! થોભ.
વીર ફૂલડે વધાવું,
મ્હારે હઇડે હુલાવું :
જરા જાતાં-જાતાં તો બાપુ ! થોભ.

આવ, આંખડીમાં ચન્દ્ર ! મૂકી રાખું;
મ્હારા માથાનો મુગટ કરી ઝાંખું;
મ્હારા મન્દિરના દેવ સ્થાપી પૂજું-પૂજાવું, હો ચન્દ્રજી !
વીર ! ફૂલડે વધાવું,
મ્હારે હઇડે હુલાવું :
જરા જાતાં-જાતાં તો બાપુ ! થોભ.

રસરાસ અધૂરા કો રહી જશે;
કંઈ-કંઇની બેલડીઓ યે તૂટશે;
પ્રાણ વારૂં, પાલવડો પ્રસારૂં, ઉભા રહો, હો ચન્દ્રજી !
વીર ફૂલડે વધાવું,
મ્હારે હઇડે હુલાવું :
જરા જાતાં-જાતાં તો બાપુ ! થોભ.

ચન્દ્ર ! જરા સાચું-ખોટું તો બાપુ ! થોભ
-૦-