ન્હાના ન્હાના રાસ/માયા ઉતારી
| ← એ રત | ન્હાના ન્હાના રાસ - ભાગ ૧ માયા ઉતારી ન્હાનાલાલ કવિ |
એ દિવસો → |
ન્હાના ન્હાના રાસ/માયા ઉતારી
આવ્યો અષાઢ ગાઢ આભલાં છવાયાં;
આંસુડે ચીર સૌ ભીંજાયા:
સુહાગી દેવ !
એવાં શાં આળ રાજ ! માયા ઉતારી?
ચન્દાને સૂર્યમાં મ્હારાં જ્ય્હાં સદા સમાણા,
આંખોના તેજ એ હોલાણાં:
સુહાગી દેવ !
એવાં શાં આળ રાજ ! માયા ઉતારી?
પૃથ્વીનાં પુણ્ય જ્ય્હાં પ્રકાશતાં મેં દીઠાં,
આત્મામૃત ઓસર્યાં એ મીઠ્ઠાં,
સુહાગી દેવ !
એવાં શાં આળ રાજ ! માયા ઉતારી?
વિશ્વના વિલાસ જે ભ્રકુટિમાં વિરાજે,
નાચે ન નેણ એહ આજે,
સુહાગી દેવ !
એવાં શાં આળ રાજ ! માયા ઉતારી?
હૈયાના મેઘનો હિંચે છે જી હીંડોલો;
આશાનો એક બોલ બોલો:
સુહાગી દેવ !
એવાં શાં આળ રાજ ! માયા ઉતારી?