ન્હાના ન્હાના રાસ/રંગધેલી

વિકિસ્રોતમાંથી
Jump to navigation Jump to search
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← મળિયા મુજને નાથ ન્હાના ન્હાના રાસ - ભાગ ૨
રંગધેલી
ન્હાનાલાલ કવિ
રાસ →


  
રાસે રમે રંગઘેલી,
સાહેલડી રાસે રમે રે. ધ્રુવ.

અબિલગુલાલના સાથિયા રે પૂર્યા :
વિશ્વ ભરી છોળ એ ઉડેલી :
સાહેલડી રાસે રમે રે.

ચોળીમાં મોરલા ને ચુન્દડીમાં ચાતકો ;
અંગ‌અંગ ફૂલડે ફૂલેલી :
સાહેલડી રાસે રમે રે.

આંખોમાં ઉગિયા આશાના ચન્દ્રમા ;
મુખડે શી મોહિની ચ્હડેલી !
સાહેલડી રાસે રમે રે.

ભૃકુટિ નમેલી, કંઠકળી યે નમેલી ;
નમણી નમેલી દેહવલી :
સાહેલડી રાસે રમે રે.

મદે ઢળી ચાલમાં, સોહાગભર્યા ભાલમાં,
કામિનીની કવિતા ઝૂકેલી :
સાહેલડી રાસે રમે રે.

આત્માની પ્રેમજ્યોતે દેહે કીધા દીવડા ,
દીપે દીપે દુનિયાં દાઝેલી :
સાહેલડી રાસે રમે રે.

મેદની ભૂલાવી, મહામાયા સ્મરાવતી,
ફૂદડી ફરે છે અલબેલી :
સાહેલડી રાસે રમે રે.

રાસે રમે રંગઘેલી,
સાહેલડી રાસે રમે રે.
-૦-