ન્હાના ન્હાના રાસ/વસન્તરંગ
| ← વસન્તને વધામણે | ન્હાના ન્હાના રાસ - ભાગ ૨ વસન્તરંગ ન્હાનાલાલ કવિ |
વિશ્વ વધાવા → |
વસન્તરંગ
સૃષ્ટિને સૃષ્ટાએ સંજીવન છાંટિયાં ;
દેવરંગ દીપતા દિગન્ત હો !
વસન્તરંગ ગગને ચ્હડે રે.
ફૂટે જનવનને નવપાંખો નવપલ્લવે ;
પૃથ્વી વેરે ફૂલડે વસન્ત હો !
વસન્તરંગ જગતે ચ્હડે રે.
ઉછળે રસઓઘ કાંઈ અંગમાં ને આત્મમાં ;
ઉષ્માના ગાજે ગગન ધોધ હો !
વસન્તરંગ હૈડે ચ્હડે રે.
કેસરાળી ચોળી અને કેસુછાંટી ચુન્દડી ;
ઘૂમે વસન્તી પાઘે જોધ હો !
વસન્તરંગ અંગે ચ્હડે રે.
દિલના દિલરંગ દેહડાળીએ મ્હોરી ઝૂલે :
વદન-વદન હસી ઉઠે ગુલાબ હો !
વસન્તરંગ વદને ચ્હડે રે.
નયન-નયન અંજાયાં અંજન વસન્તનાં ;
દેવમધુથી છલકે નયનછાબ હો !
વસન્તરંગ નયણે ચ્હડે રે.