રસિકવલ્લભ/પદ-૧૦૦

વિકિસ્રોતમાંથી
દિશાશોધન પર જાઓ શોધ પર જાઓ
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← પદ-૯૯ રસિકવલ્લભ
પદ-૧૦૦
દયારામ
પદ-૧૦૧ →


પદ ૧૦૦ મું

<poem>

સુણ ગુરુ વાણી વદિયો શિષ્યજી, સહજ બને સહુ લખ્યું ભવિષ્યજી; માટે કહો છો ફિકર વિસરવીજી, તદા ભજન ચિંતા શીદ ધરવીજી ? ૧

તે પણ થાવાનું તે થાશેજી, લખ્યા પ્રમાણે ક્યમ ટળી જાશેજી; સુણી એમ બોલ્યા શ્રીગુરુ વાણીજી, સત્ય કહી તેં વાત વખાણીજી. ૨

ઢાળ

સાચી વખાણી વાત સાંભળ, કહું શંકા જાય, સહુ લખ્યું ત્યમ હરિભજન નથી લખિયું કર્યેથી થાય. ૩

જો કદા કહીએ ભજન પણ પ્રારબ્ધ લખ્યું બની આવે; તો વૈદકશાસ્ત્ર પ્રબોધ વાચક, સકલ વ્યર્થ કહાવે. ૪

તે માટે અતિ આતુર થઈ, ભજવા સદા ભગવંત; ક્ષણ ભંગ મનુષ્ય દેહ દુર્લભ, મળે પુણ્ય અનંત. ૫

મનુષ્ય જીવનની દુર્લભતા

સૌ યોનિમાં છે વિષય સુખ, ત્યાં હરિજન નવ હોય; તે માટ અમૂલખ આ સમય ચેતે ન તે સહુ ખોય. ૬

ભક્તિ માટે જ મનુષ્યજીવન

ભરતખંડ મોંઘું મનુષ્ય તનુ, જેની અમરને પણ ભૂખ. તે મળે કૃષ્ણ ભજ્યા ન તો, ગયું આવ્યું હસ્તપીયૂષ. ૭

મનુષ્યજીવનનું સાર્થક્ય

કહું લાખ વાતની વાત, સહેલું નામ રટ શ્રીકૃષ્ણ; પ્રભુ દયા પ્રીતમ પ્રસન્ન થાશે, સકલ પૂરણ તૃષ્ણ. ૮

(પૂર્ણ)