રસિકવલ્લભ/પદ-૧૦૧

વિકિસ્રોતમાંથી
દિશાશોધન પર જાઓ શોધ પર જાઓ
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← પદ-૧૦૦ રસિકવલ્લભ
પદ-૧૦૧
દયારામ
પદ-૧૦૨ →


પદ ૧૦૧ મું

<poem>

નામ કૃષ્ણનું શિરોમણિ સહુનુંજી, મૂળધર્મ સાધનાદિ બહુનુંજી; જપતાં સર્વે ચિંતા ચૂર્ણજી, મનોકામના સઘળી પૂર્ણજી. ૧

નામે નામી ઉરમાં વાસેજી, અઘ દુઃખ સંદેહ સઘળા નાસેજી; નામે નામી નામ પ્રતીતિજી, અંતક અવિદ્યા ભાજે ભીતિજી. ૨

ઢાળ

શ્રીકૃષ્ણના નામનું માહાત્મ્ય

ભીતિ હરે હરિ પ્રીતિ આપે, પરમાનંદ પદ દાય; શ્રીકૃષ્ણ નામ પ્રભાવ કૃષ્ણે પણ કહ્યો નવ જાય. ૩

હરિ નામ કોટિક અપર તુલ્ય ન, નામ કૃષ્ણ વ્રજેશ; જ્યમ બીજથી ચઢતી કળા, શશી કો ન સમ રાકેશ. ૪

છે પૂર્ણ ઇંદુ કૃષ્ણ કેવળ, શરદ સહ શ્રીકૃષ્ણ; નારાયણે વિધિ કહ્યું સ્કંધે, ઉત્તર સુણ વણ પ્રશ્ન. ૫

ગૌ, કામ, સુરદ્રુમ, ચિંતામણિ, નહિ કૃષ્ણ નામ સમાન; હિત અહિત સમજી નામ રીતે, એ ન દે વરદાન. ૬

સત્સંગ કરવો પ્રયત્ને, સેવવા શ્રીવ્રજરાય; દુઃસંગથી ત્યમ નાસવું, પછી બન્યું હરિ ઇચ્છાય. ૭

લાવી ભરોંસો આળસી, વિસરવું ન શ્રીહરિ નામ; ગુણ જ્ઞાન ક્ષણું ન છોડવું, દયા પ્રીતમ સુંદર શ્યામ. ૮

(પૂર્ણ)