રસિકવલ્લભ/પદ-૨૫
| ← પદ-૨૪ | રસિકવલ્લભ પદ-૨૫ દયારામ |
પદ-૨૬ → |
પદ ૨૪ મું
વત્સ કદા મહિષી નવ ધાવેજી, ધેનુ મહિષ ન આવેજી;
ગુણ અવગુણનું કશું ન કામજી, ચિત્ત જેહનું જ્યાંહ ત્યાંહજ વિરામજી. ૧
ભૂલું પડિયું બાળક રોયજી, મુખ અધમોત્તમ સહુનાં જોયજી;
તદપિ ન ભટકણ ભાગે મનનીજી, સદ્ય શાન્તતા મળતાં જનનીજી. ૨
ઢાળ
જ્યમ જનનિ મળતાં જંપ તત્ક્ષણ, અવર રહે નહિ આશ;
પછી બોધ તેહને ન કરવો, પામ્યા પૂરણ અભિલાશ. ૩
સઘળે નમે પંચપિરિયા, જીવ આસુરી કહેવાય;
ઉપજતાં માયામાં મળ્યા, કેમ એક ઠોર ઠરાય. ૪
એકદા શ્રીમદ્ પુરુષોત્તમ ઇચ્છા ઉપનિ એહવી;
વિસ્તાર જગમાં થાય જશનો, કૃતિ કરવી તેહવી. ૫
એમ ધારી ભૃકુટિ ભંગથી, ઉપજાવી સૃષ્ટિ સાર;
બ્રહ્માંડ ભવ્ય વિચિત્ર નાના, લોક દશ ને ચાર, ૬
મહી મંડળ, નવ ખંડાદિ, રચના રમત માત્રમાં કીધી;
જુગ પ્રકારે રચિ સૃષ્ટિ, કરવા નિજપર પ્રસિદ્ધિ. ૭
એક દૈવી બીજી આસુરી ઉપજાવિ આપોઆપ;
જન દયા પ્રીતમ, સકળ શક્તિ પતિ અતુલ પ્રતાપ.૮