રસિકવલ્લભ/પદ-૩૯

વિકિસ્રોતમાંથી
દિશાશોધન પર જાઓ શોધ પર જાઓ
Padlock-red.svg
આ કૃતિ/પૃષ્ઠની ભૂલશુદ્ધિ પૂર્ણ થતા આ પૃષ્ઠના લેખનને સુરક્ષિત કરી દેવામાં આવ્યું છે. આ પૃષ્ઠ પર પ્રબંધક સિવાય અન્ય સભ્યો ફેરફાર કરી શકશે નહીં. જો આપ આમાં કોઈ સુધારો સૂચવવા માંગો તો ચર્ચાના પાના પર આપની ટિપ્પણી મૂકશો.
← પદ-૩૮ રસિકવલ્લભ
પદ-૩૯
દયારામ
પદ-૪૦ →


<poem>

પદ ૩૯ મું

ગુરુએ કરેલો ખુલાસો સુણી એમ વદિયા ગુરુવચંનજી, તું સમ નથી કો મૂર્ખ જંનજી; ભેદ શૂન્ય જો ગુરુ નિજ પેખેજી, શિષ્ય ગુરુને ભિન્ન નાં દેખેજી. ૧

અવર વસ્તુ જો છે નહિ લેશજી, ગુરુ કહે કહોને ઉપદેશજી; ભેદ દૃષ્ટિ તુજ મત નહિ જ્ઞાંનજી, સુણ્યો ન ઉપદેષ્ટા અજ્ઞાનજી. ૨

ઢાળ જગતની અસત્યતા માટે શિષ્યે આપેલું ચંદ્રનું દૃષ્ટાંત

અજ્ઞાનીને અધિકાર નહિ, જ્ઞાની ન ભેદ લગાર; તો તાહરે મત ઉપદેશનો, સંભવે નહિ જ વિચાર. ૩

એમ સુણી બોલ્યો શિષ્ય, વિનિત કરું સુણીયે સ્વામી; એ વાત જૂઠી નથી, સાચી છે જ, કહું શિરનામી. ૪

એક ચન્દ્ર, દૃષ્ટિદોષવાળો દેખે ઉભયાકાર; દેખનારો પણ સત્ય ન કહે, સમજી નેત્ર વિકાર. ૫

નિત્ય પ્રત્યે એક વિલોકીયો તે, સત્ય માને મંન; પરિણામ મિથ્યા મિથુન થાતાં નિર્મળાં લોચન. ૬

શિષ્યના દૃષ્ટાન્તથી પણ જગત્‌ની સત્યતાનો ગુરુએ જણાઅવેલો સિદ્ધાન્ત

સુણ શિષ્ય શશિ સાચો ન છળતો શું દૃષ્ટિ બે આવે? જો જોનારો નથી સત્ય તો, બે ચન્દ્ર કોણ બતાવે? ૭

શ્રોતા ન સાચો હોય તો કહે કોણ આગળ વાત? સાકાર સાચા દયાપ્રીતમ, સત્ય ભવ સાક્ષાત્. ૮ -૦-