રસિકવલ્લભ/પદ-૮૩
| ← પદ-૮૨ | રસિકવલ્લભ પદ-૮૩ દયારામ |
પદ-૮૪ → |
પદ ૮૨ મું
રમણિક શ્રી વૃંદાવન ધામજી, નવ દ્રુમવેલી અતિ અભિરામજી;
સ્વચ્છ મનોહર મૃદુમણિમય ક્ષમાજી, અચલાનંદમય પૂરણ ચંદ્રમાજી. ૧
જ્યાં શ્રીયમુના સરિતાકારજી, મણિપુરજટિત તટ છબી સારજી;
પુષ્ય પુલિન સુંદર સોપાનજી, કમલ કુમુદ નાનાં અલિગાનજી. ૨
ઢાળ
કરે ગાન મધુકર મનોહર, મન મત્ત મન મકરંદ;
ત્યાં ત્રિવિધ પવન વહે સુખદ શીતલ સુગંધિ મંદ. ૩
કંચનલતા, મલ્લિકા, માલતી, કેતકી, રહી ફૂલી,
ચંપક, બકુલ, કહ્લાર, પ્રફુલ્લિત, વલ્લરી રહૂ ઝૂલી. ૪
મણિ રત્નમય ગિરિરાજશ્રી, શ્રીનાથ મન લોભાય;
અવ્યક્ત મધુર સુશબ્દ દ્વિજિગણ, શોભા કહી નવ જાય. ૫
શતપત્ર લોચન સુંદરી, શ્યામા તણાં બહુ વૃંદ;
તે મધ્ય વિલસે લાલ નટવર, રસિકમણિ ગોવિંદ. ૬
નિત્ય નવલ રાસ વિલાસ, રચના કથનમાં કયમ આવે ?
છે નિત્યલીલા અપ્રકૃત, આનંદમય શ્રુતિ ગાવે. ૭
એ પુષ્ટિસૃષ્ટિ સર્વની, શ્રીઅંગથી ઉત્પત્ય;
જન દયાપ્રીતમ કૃષ્ણરૂપ, વના ઠરે નહીં મત્ય. ૮