રાસચંદ્રિકા/પોઢામણું
| ← હજાર માસની રીત | રાસચંદ્રિકા પોઢામણું અરદેશર ખબરદાર |
હાલરડું → |
પોઢામણું
♦ ગરબી [૧]. ♦
બાળકડાં પોઢો રે મારાં બાળકડાં પોઢો !
પંખીડા સૂતાં જઈ માળે
ખાઈ હિંદોળા આંબા ડાળે, -
ઝૂલતાં પારણિયાં મહાલે,
બાળકડાં પોઢો !
બાળકડાં પોઢો રે વહાલાં બાળકડાં પોઢો ! ૧
નીંદરડી આ આવી અટારી,
ગાતી ને નાચંતી સારી;-
કોમળડાં નેણોને ઠારી,
બાળકડાં પોઢો !
બાળકડાં પોઢો રે મીઠાં બાળકડાં પોઢો ! ૨
તારલિયા રક્ષો મુજ બાપુ;
ચાંદલિયા અમૃત આપું,
દુખડાં લઈ હ્રદિયાશું ચાંપું,
બાળકડાં પોઢો !
બાળકડાં પોઢો રે મોંઘા બાળકડાં પોઢો ! ૩
પંખીડાં ઊઠશે સહુ જ્યારે,
કલરવ કરતાં ગાશે ત્યારે
હસતાં રમતાં ઊઠજો હાં રે -
બાળકડાં પોઢો !
બાળકડાં પોઢો રે મારાં બાળકડાં પોઢો ! ૪
- ↑ 'અંજની ગીત' ના ઢાળ પર