રાસચંદ્રિકા/ફૂલવાડીનો મોરલો
| ← અમરવસંત | રાસચંદ્રિકા ફૂલવાડીનો મોરલો અરદેશર ખબરદાર |
કોયલ બહેનાં → |
ફૂલવાડીનો મોરલો
♦ કે આભમાં ઝીણી ઝબૂકે વીજળી રે. ♦
કે કુંજમાં મઘમઘ મહેકે ફૂલડાં રે,
કે આવી મોંઘી દેવવસંત;
કે નાચે ફૂલવાડીનો મોરલો રે.
કે પાંદડે પાંદડે પલકે હીરલા રે,
કે ઊછળે ઉર ઉર ભાવ અનંત :
કે નાચે ફૂલવાડીનો મોરલો રે. ૧
કે આભને માથે રંગભર છોગલાં રે,
કે એવાં ધરણીશિર ગુલમૉર :
કે નાચે ફૂલવાડીનો મોરલો રે.
કે ઊઘડે ચંદરવા દિશ દિશ તણા રે,
કે ઊઘડે હૈડાં આઠે પહોર :
કે નાચે ફૂલવાડીનો મોરલો રે. ૨
કે મોગરા ગગને ખીલ્યા તેજના રે,
કે ચૂંદડી જગની રતનજડાવ :
કે નાચે ફૂલવાડીનો મોરલો રે.
કે સૂરજ છાંટે નવરસ છાંટણાં રે,
કે એવા અંતર અમીછંટકાવ :
કે નાચે ફૂલવાડીનો મોરલો રે. ૪
કે શિર પર ડોલે કલગી વિભૂતિની રે,
કે અદ્ભૂગત ખોલે પ્રાણકલાપ :
કે નાચે ફૂલવાડીનો મોરલો રે.
કે થનગન લોલે આંગણાં રે,
કે ટહુકે ગરજે આતમ આપ :
કે નાચે ઉરવાડીનો મોરલો રે. ૫